Dumaya seçki: yenilənmiş nəticələr
Rusiya parlamentinin aşağı palatasına – Dövlət Dumasına sentyabrın 17-19-da keçirilmiş seçkinin ilkin nəticələri yenilənib.
Novator.az bildirir ki, 450 nəfərlik Dumanın 225 deputatının seçildiyi proporsional sistemdə 5 partiya uğur qazanır. İlkin nəticələrə əsasən azı 5 faiz səs toplayan partiyalar bunlardır: Vahid Rusiya Partiyası (49,8%), Kommunist Partiyası (18,9%), Liberal Demokrat Partiyası (7,5%), Ədalətli Rusiya Partiyası (7,4%), Yeni Adamlar Partiyası (5,3%).
Dairələr üzrə müəyyənləşən 225 mandatın 198-i Vahid Rusiya Partiyasına, 9-u Kommunist Partiyasına, 8-i Ədalətli Rusiya Partiyasına düşür.
Liberal Demokrat Partiyası 2, Vətən Partiyası, Vətəndaş Platforması Partiyası, Yüksəliş Partiyası hərəyə 1 mandat, müstəqil namizədlər 5 mandat götürür.
Rusiya Konstitusiyasına görə, baş naziri, baş nazirin müavinlərini və federal nazirləri prezidentin təqdimatı ilə Dövlət Duması təyin edir.
Hakim Vahid Rusiya Partiyasına Təhlükəsizlik Şurası sədrinin müavini Dmitri Medvedyev liderlik edir.
Dmitri Medvedyev 2008-2012-ci illərdə Rusiya prezidenti postunu tutub.
İndiki dövlət başçısı Vladimir Putin 1999-cu il avqustun 16-da baş nazir olub, dekabrın 31-dən həmçinin prezident vəzifəsini icra edib. 2000 və 2004-cü illərdə prezident seçilib.
2008-ci ildən baş nazir kürsüsündə əyləşib, 2012 və 2018-ci illərin prezident seçkilərində qalib gəlib.
Mənbə: Cikrf.ru
