UEFA-nın klub reytinqi
55 üzvü olan UEFA-nın klub turnirlərində qrup mərhələsinin ilk turu başa çatıb. Novator.az bildirir ki, 2021-2022 mövsümündə 96 komanda qalır: Çempionlar Liqası, Avropa Liqası və Konfrans Liqasının hər birində 32 klub yarışır.
Azərbaycan Konfrans Liqasında “Qarabağ” komandası ilə təmsil olunur, UEFA-nın klub reytinqində 29-cu pillədədir. Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 2,375 əmsal əldə edib.
Reytinqin ilk sırasında İngiltərə dayanır. Rusiya 10-cu, Ukrayna 11-ci, Türkiyə 18-ci, Qazaxıstan 27-ci, Belarus 32-ci, Moldova 33-cü, Litva 34-cü, Latviya 37-ci, Ermənistan 43-cü, Gürcüstan 46-cı, Estoniya 49-cu yerdədir.
