Prezident İlham Əliyevin 15 yanvar fərmanı ilə Azərbaycan Respublikası Ərazilərinin Minalardan Təmizlənməsi üzrə Milli Agentliyin əsasında Minatəmizləmə Agentliyi yaradılıb. Fevralın 4-də Vüqar Süleymanov Minatəmizləmə Agentliyinin İdarə Heyətinin sədri təyin olunub.

Sentyabrın 16-da dövlət başçısı minatəmizləmə fəaliyyətinin əlaqələndirilməsinə fərman verib. Fərmana görə, Nazirlər Kabineti beynəlxalq humanitar minatəmizləmə standartları nəzərə alaraq minatəmizləmə fəaliyyətinə dair tələbləri üç ay müddətində təsdiq etməli; Minatəmizləmə Agentliyinin təklifləri əsasında Azərbaycan Respublikasının işğaldan azad edilmiş ərazilərinin, habelə müharibə və hərbi əməliyyatların təsirinə məruz qalmış digər ərazilərin minalardan və partlamamış hərbi sursatdan, tərkibində partlayıcı olan qurğulardan və digər partlayıcı qalıqlarından təmizlənməsi sahəsində prioritet təşkil edən ərazilər nəzərə alınmaqla minatəmizləmə üzrə illik planı hər il dekabrın 25-dək təsdiqləməli; minatəmizləmə sahəsində fəaliyyət göstərən dövlət orqanları arasında tapşırıqların bölgüsünü həyata keçirməli; Minatəmizləmə Agentliyinin maddi-texniki təminatını gücləndirmək məqsədilə zəruri tədbirlər görülməsini təmin etməlidir.

Minatəmizləmə Agentliyinə minatəmizləmə sahəsində fəaliyyət göstərən digər dövlət orqanlarının, fiziki və hüquqi şəxslərin, habelə xarici ölkələrin müvafiq qurumlarının minatəmizləmə fəaliyyəti üzrə mövcud qüvvə və vasitələri nəzərə alınmaqla ərazilərdə minatəmizləmə fəaliyyətinin hər növbəti il üçün planlaşdırılmasına dair təkliflərini dekabrın 1-dək hazırlayıb Nazirlər Kabinetinə təqdim etmək tapşırılıb.