Alqış Həsənoğlu baş redaktorluğa qayıtdı
Sentyabrın 10-da Yeni Azərbaycan Partiyası İdarə Heyətinin iclası keçirilib. İclasda partiyanın qəzeti “Yeni Azərbaycan”a yeni baş redaktor təyin olunub: Alqış Həsənoğlu (Musayev).
Əvvəlki baş redaktor, parlament üzvü Hikmət Babaoğlu (Məmmədov) partiyanın Mərkəzi Aparatı ilə Milli Məclisdəki deputat qrupu arasında əlaqələndirici müəyyən edilib.
Novator.az bildirir ki, 1969-cu il təvəllüdlü Alqış Həsənoğlu 1993-cü ildən “Yeni Azərbaycan” qəzetində çalışıb, 1997-2008-ci illərdə baş redaktor postunu tutub.
Bakı Dövlət Universitetini bitirən Alqış Həsənoğlu filologiya elmləri namizədidir.
2003-2005-ci illərdə Milli Məclisin deputatı olub.
1992-ci ildə qurulan Yeni Azərbaycan Partiyasına prezident İlham Əliyev sədrlik edir. Partiya parlamentdə 69 deputatla təmsil olunur.
İdarə Heyəti partiyanın daimi fəaliyyət göstərən rəhbər orqanıdır. Üzvlər qurultayda partiya sədrinin təqdimatı ilə seçilir. Partiyanın sədri vəzifəsinə görə eyni zamanda İdarə Heyətinin sədridir.
1993-cü ildən çıxan “Yeni Azərbaycan” qəzetinə 1997-ci ilədək Xeyrəddin Qoca baş redaktorluq edib. Hikmət Babaoğlu baş redaktor vəzifəsini 2008-ci ildən tutub.
