Məhbus məmur vəfat edib
Ağstafa Rayon İcra Hakimiyyətinin sabiq başçısı, məhbus Nizaməddin Quliyev vəfat edib. Xəbər sentyabrın 8-də yayılıb.
Nizaməddin Quliyev 1954-cü ildə Goranboyun Tapqaraqoyunlu kəndində doğulub. İndiki Azərbaycan Dövlət Aqrar Universitetini, Elmi-Tədqiqat Kənd Təsərrüfatı İqtisadiyyatı və Təşkili İnstitutunun aspiranturasını bitirib, iqtisad elmləri namizədi elmi dərəcəsi alıb.
2009-2019-cu illərdə Goranboy Rayon İcra Hakimiyyətinin başçısı olub. 2019-ci ildə Ağstafa Rayon İcra Hakimiyyətinin başçısı təyin edilib, həmin il dekabrın 18-də həbs edilib, dekabrın 20-də işdən götürülüb. O, vəzifə səlahiyyətlərindən sui-istifadə, külli miqdarda təkrar rüşvət alma, mənimsəmə və başqa cinayətlərdə təqsirli bilinərək azadlıqdan məhrum edilmişdi.
2019-cu ilin dekabr ayında Ağstafanın icra başçısı ilə yanaşı Yevlaxın sabiq icra başçısı, 2020-ci ilin fevral ayında Neftçalanın icra başçısı, aprel ayında Biləsuvarın icra başçısı, may ayında İmişlinin icra başçısı, avqust ayında Kürdəmirin icra başçısı, dekabr ayında Cəlilabadın icra başçısı, 2021-ci ilin aprelində Şəmkirin icra başçısı tutulub. Onların hamısına vəzifə səlahiyyətlərindən sui-istifadə, mənimsəmə, rüşvət alma kimi ittihamlar verilib.
