1500 il əvvəlin xəzinəsi tapılıb
Danimarkada VI əsrə aid xəzinə tapılıb.
Novator.az saytı “Euronews” kanalına istinadla xəbər verir ki, xəzinə 22 qızıl əşyadan ibarətdir və ümumi çəkisi bir kiloqrama yaxındır.
Bu, Danimarkada tapılmış ən iri xəzinələrdən biridir.
Xəzinəni həvəskar arxeoloq 6 ay əvvəl metal detektoru vasitəsilə tapıb. Lakin bu müddətdə xəzinənin aşkarlanması faktı məxfi saxlanıb və məlumat yalnız 6 ay sonra ictimaiyyətə açıqlanıb.
Xəzinənin basdırıldığı ərazi (Yutlandiya yarımadası, Yelinq yaşayış məntəqəsi) Danimarkada dövlətçiliyin vətəni sayılır. Danimarkada ilk dövlət məhz bu ərazidə təşəkkül tapıb.
Xəzinə Danimarka Milli Muzeyində saxlanacaq, gələn ilin fevralında ölkənin başqa muzeylərindən birində sərgiyə çıxarılacaq.
Mənbə: Euronews.com
