İsrail peyvəndin dördüncü dozasına hazırlaşır
İsraildə əhaliyə koronavirus infeksiyasına qarşı peyvəndin dördüncü dozasının vurulmasına hazırlıq görülür.
Novator.az-ın məlumatına görə, ölkənin koronavirusla mübarizə üzrə milli proqramının rəhbəri professor Salman Zarka bu niyyəti sentyabrın 4-də ictimai radio vasitəsilə açıqlayıb. O, hər kəsi COVİD-19 infeksiyasına qarşı peyvəndin dördüncü dozasının tətbiqinə hazır olmağa çağırıb: “Virus var və olacaq. Biz dördüncü dozaya hazırlaşmalıyıq. Virusun varlığını, peyvəndlərin və peyvəndlənmiş insanlarda yaranan antitel səviyyəsinin zəiflədiyini nəzərə alsaq, bir neçə aydan bir, yaxud ildə bir-iki dəfə yenidən peyvəndlənməyə zərurət yarana bilər. İndən belə bu, bizim həyatımızın bir reallığı olacaq”.
Salman Zarka dördüncü dozanın tətbiqinə nə zaman başlanacağını açıqlamayıb.
Son həftələrdə İsraildə 6 ay əvvələdək iki dozada peyvəndlənmiş insanların immun sistemini gücləndirmək məqsədilə onlara üçüncü dozanın vurulması ilə bağlı yeni kampaniya start götürüb.
İsrail Səhiyyə Nazirliyinin məlumatına görə, ölkədə artıq 2,5 milyon insan üçüncü dozanı qəbul edib.
2019-cu ilin dekabrında Çində üzə çıxaraq dünyanı bürüyən koronavirus infeksiyası 210 ölkə, ərazi və məkanda 4 milyon 592 mindən çox adamın ölümünə səbəb olub. Bu ölümlərin 7200-dən çoxu İsraildə qeydə alınıb.
Mənbə: Lefigaro.fr
