Gənclər və idman naziri təyin edildi
Fərid Fazil oğlu Qayıbov gənclər və idman naziri təyin edilib. Prezident İlham Əliyev sərəncamı sentyabrın 7-də imzalayıb.
Əvvəlki gənclər və idman naziri Azad Rəhimov aprelin 30-da vəfat edib. O, 7 fevral 2006-cı ildən gənclər və idman naziri idi.
Fərid Qayıbov 1979-cu ildə Bakıda doğulub. Orta təhsili paytaxtdakı 1 saylı orta məktəbdə, ali təhsili Azərbaycan Xalq Təsərrüfatını İdarəetmə İnstitutunda (biznesin idarə edilməsi ixtisası üzrə) alıb.
2000-2003-cü illərdə Dövlət Neft Şirkətinin “Balaxanıneft” Neft-Qaz Hasilatı İdarəsində müxtəlif vəzifələrdə işləyib.
2003-cü ildən Azərbaycan Gimnastika Federasiyasında fəaliyyət göstərməyə başlayıb, idman və logistika üzrə menecer, federasiyanın baş meneceri vəzifələrində çalışıb, 2006-cı ildən federasiyanın baş katibi olub.
Pedaqoji elmlər namizədidir.
Evlidir, iki oğlu, bir qızı var.
Novator.az bildirir ki, Gənclər və İdman Nazirliyi 26 iyul 1994-cü ildə Dövlət Bədən Tərbiyəsi və İdman Komitəsinin ləğvi ilə yaradılıb, 18 aprel 2001-ci ildən 30 yanvar 2006-ci ilədək Gənclər, İdman və Turizm Nazirliyi adı daşıyıb.
