Vəkildən hakimə Rövşən Əkbərov ittihamı
Bakı Hərbi Məhkəməsində general-leytenant Rövşən Əkbərovun mühakiməsi aparılır.
1965-ci il təvəllüdlü Rövşən Əkbərov Kiyev Ali Ümumqoşun Komandirləri Məktəbinin məzunudur. SSRİ Silahlı Qüvvələrində və Azərbaycan Ordusunda xidmət edib. Əfqanıstan və Qarabağ müharibələrinin veteranıdır. 2021-ci il fevralın 8-də onun ehtiyata buraxıldığı xəbər verilib. Ehtiyata buraxılana qədər Rövşən Əkbərov Azərbaycan Ordusunun birlik komandiri olub.
2021-ci il martın 15-də Rövşən Əkbərov həbs edilib. O, 1 iyun 2001-ci ildə Ukraynanın paytaxtı Kiyevdə Azərbaycan vətəndaşı Əliyev Elçin Fəday oğlunu bıçaqla öldürməkdə təqsirli bilinir.
Novator.az-ın məlumatına görə, mühakimə prosesində Elçin Əliyevin ailəsini təmsil edən vəkil Elçin Sadıqov sentyabrın 2-də Məhkəmə-Hüquq Şurasının sədri Fikrət Məmmədova və Ali Məhkəmənin sədri Ramiz Rzayevə müraciət ünvanlayıb. O yazır ki, Rövşən Əkbərov xüsusilə ağır cinayətdə təqsirləndirilməsinə baxmayaraq məhkəmə iclasında qoluna qandal vurulmadan və ya ani hərəkətinin qarşısını alacaq vasitə olmadan oturdurulur: “İstədiyi vaxt ayağa qalxır və hərəkət edir. Şahidlərə və proses iştirakçılarına müdaxilə edir, təhqiramiz ifadələr işlədir. Bütün bunlara şəraiti məhkəmə iclasına sədrlik edən hakim Həbib Həsənov şərait yaradır. Bu da ən əsası şahidləri həqiqəti deməyə çəkindirir.
Rövşən Əkbərov xüsusi təyinatlıdır. Təbiətcə çılğındır və proses iştirakçılarının həyatı və sağlamlığı üçün real təhlükədir”.
Vəkil prosesdə karantin qaydalarının pozulduğunu da vurğulayır: “Rövşən Əkbərovun bütün qohum-əqrəbası, dost-tanışı məhkəmə iclas zalına buraxılır. Xahiş edirəm, hakim Həbib Həsənovun Rövşən Əkbərova qarşı xüsusi imtiyaz yaratmasının, Rövşən Əkbərovun bizim və digərlərinin həyatına təhlükə yaratmasının qarşısının alınması üçün tövsiyələr verəsiniz”.
