İşsizin pulunu kəsirlər
İqtisadçı alim, Azərbaycan Demokratiya və Rifah Hərəkatının sədri Qubad İbadoğlu işsizlərə sığorta ödənişi statistikasına diqqət çəkib. Novator.az-ın məlumatına görə, o yazır ki, 2019-cu ildə sığorta ödənişinin maliyyələşdirilməsi üçün 11 milyon manat vəsait proqnozlaşdırılıb, lakin il ərzində həmin vəsaitin 20,9 faizi sərf olunub: “2020-ci ildə proqnozlaşdırılan 10 milyon manat vəsaitin 16,5 faizi istifadə edilib. Bu mənbədən qənaət edilən vəsait digər məqsədlərə yönəldilib.
İşsizlikdən sığorta vəsaiti əməyin ödənişi fondu və işçinin əməkhaqqından 0,5 faiz tutulmalar hesabına formalaşır. Belə çıxır ki, hökumət işləyənlərdən yığdığı vəsaiti işsizlərlə bölüşmək istəmir”.
“İşsizlikdən sığorta haqqında” qanuna əsasən, sığorta ödənişini dövlət orqanı və ya hüquqi şəxs ləğvi edildikdə; işçilərin və ya dövlət qulluqçularının sayı və ya ştatları ixtisar edildikdə; əmək müqaviləsinin müddəti qurtardıqda rəsmən işsiz kimi qeydiyyata alınmış sığortaolunanlar ala bilər.
İlk iki halda işsizlikdən sığorta ödənişi üçün azı 1 il sığorta stajı tələb olunur və ödəniş işçinin itirilmiş orta aylıq əməkhaqqının 50 faizi məbləğində hesablanır.
Əmək münasibətlərinə əmək müqaviləsinin müddətinin bitməsi əsasları ilə xitam verilmiş şəxslərə ödəniş üçün onların müddətli əmək müqaviləsi üzrə ən azı 3 il fasiləsiz iş stajı olmalıdır. Sığorta ödənişi minimum əməkhaqqı (250 manat) qədər və 3 ay müddətinə ödənir.
Sığorta ödənişinin hesablanması üçün orta aylıq əməkhaqqının məbləği Əmək və Əhalinin Sosial Müdafiəsi Nazirliyinin Mərkəzləşdirilmiş Elektron İnformasiya Sistemində sığortaolunanların sığorta haqları üzrə hesabatlarda olan aylıq gəlirləri barədə məlumatları əsasında müəyyən edilir.
