“Qarabağ”lı turnir
UEFA Konfrans Liqasında Azərbaycanı təmsil edən komandalar avqustun 26-da son təsnifat mərhələsinin cavab oyunlarını keçirib. Novator.az-ın məlumatına görə, “Neftçi” İsraildə “Makkabi”yə (Hayfa) 0:4 hesabı ilə yenilərək turnirdən ələnib (ilk oyun heç-heçə bitmişdi – 3:3), “Qarabağ” isə Şotlandiyada “Aberdin”i 3:1 hesabı ilə udaraq qrup raunduna adlayıb (ilk oyunda Azərbaycan təmsilçisi 1 cavabsız topla üstün gəlmişdi).
Yeni turnir olan Konfrans Liqasının qruplarında birinci yeri tutan komandalar 1/8 finala keçəcək, ikinci yeri tutan komandalar Avropa Liqasının qruplarında üçüncü olmuş komandalarla 1/8 finala çıxmaq uğrunda yarışacaq.
Əsası 1951-ci ildə qoyulan “Qarabağ” komandası 1 dəfə Azərbaycan SSR-in çempionu, 8 dəfə müstəqil Azərbaycanın çempionu olub, 6 dəfə Avropa Liqasının qrup mərhələsində, 1 dəfə Çempionlar Liqasının qrup mərhələsində oynayıb.
