Avqustun 27-də UEFA Konfrans Liqasının qrup mərhələsinin püşkü atılıb. Azərbaycan təmsilçisi “Qarabağ” H qrupunda bu komandalara rəqib olub: “Bazel” (İsveçrə), “Kayrat” (Qazaxıstan), “Omoniya” (Kipr).

1893-cü ildə yaradılan “Bazel” 20 dəfə İsveçrə çempionu olub, üst-üstə 37 mövsümdür Avropanın klub turnirlərində çıxış edir.

1954-cü ildə qurulan “Kayrat” 3 dəfə Qazaxıstan çempionu olub, üst-üstə 11 mövsümdür Avropanın klub turnirlərində çıxış edir. Komanda üst-üstə 24 mövsüm SSRİ çempionatının yüksək dəstəsində oynayıb.

1948-ci ildə yaradılan “Omoniya” 21 dəfə Kipr çempionu olub, üst-üstə 43 mövsümdür Avropanın klub turnirlərində çıxış edir.

Novator.az bildirir ki, qrupda birinci yeri tutan komanda 1/8 finala keçəcək, ikinci yeri tutan komanda Avropa Liqasının qruplarında üçüncü olmuş komandaların biri ilə 1/8 finala çıxmaq uğrunda yarışacaq.

Qrup mərhələsi sentyabrın 16-da başlayıb dekabrın 9-da bitəcək.

Yeni turnir olan Konfrans Liqasına “Qarabağ” ikinci mərhələdən qoşulub, İsrailin “Aşdod” (0:0, 1:0), Kiprin AEL (1:0, 1:1), Şotlandiyanın “Aberdin” (1:0, 3:1) komandalarını ələyib.

Əsası 1951-ci ildə Ağdam şəhərində qoyulan “Qarabağ” komandası 1977-ci ilədək “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-nin, 8 dəfə müstəqil Azərbaycanın çempionu olub. 2014-2015, 2015-2016, 2016-2017, 2018-2019, 2019-2020, 2020-2021 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb.