Naxçıvanın makroiqtisadi göstəriciləri
Naxçıvan Muxtar Respublikasının Dövlət Statistika Komitəsi bildirir ki, yanvar-iyul aylarında bölgədə 1 milyard 603,7 milyon manatlıq ümumi daxili məhsul istehsal olunub, bu da 2020-ci ilin yeddi ayı ilə müqayisədə 0,4 faiz çoxdur.
Hər bir nəfərə düşən ümumi daxili məhsulun həcmi 3471,3 manat göstərilir.
Hesabata görə, sənayedə 2020-ci ilin yanvar-iyul aylarına nəzərən 0,9 faiz, sərmayə qoyuluşunda 0,3 faiz, kənd təsərrüfatında 3,1 faiz yüksəliş var.
İnformasiya və rabitə xidmətlərinin dəyərində 7,6 faiz, kredit məbləğində 26,8 faiz artımın qeydə alındığı vurğulanır.
Rəsmi məlumata əsasən, muxtar respublikada 384 növdə məhsul istehsal olunur, əhalinin 350 növdə məhsula tələbatı tamamilə yerli imkanlar hesabına ödənir.
Qeyd olunur ki, iyulun 1-nə muxtar respublika iqtisadiyyatında bir işçiyə hesablanmış orta aylıq əməkhaqqı 540,8 manat məbləğində rəsmiləşib.
