Ermənistan 3 aylıq hərbi toplanışa gedir
Ermənistanda 3 aylıq hərbi təlim toplanışı elan olunub. Novator.az bildirir ki, hökumətin qərarı ilə toplanış avqustun 25-dən noyabrın 25-dək davam edəcək.
Toplanışa cəlb ediləcək mülki şəxslərin 3 ay müddətində hərbi qulluqçu sayılacağı bəyan olunub.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi bölgədə atəşkəsə məsul Rusiya Ordusu bölmələrinin əlindədir.
Azad edilmiş sərhəd bölgələrində mühafizə sistemi gücləndirilir. Azərbaycan hərbçiləri 2021-ci ilin may ayında Ermənistanla sərhədin Laçın və Kəlbəcər istiqamətində bəzi əraziləri nəzarətə götürüb. Ermənistan bunu öz ərazisinə müdaxilə sayır.
Azərbaycanın “Hərbi vəzifə və hərbi xidmət haqqında” qanununa görə, ehtiyatda olan hərbi vəzifəlilər il ərzində bir dəfədən çox olmayaraq 1-2 ayadək müddətə toplanışlara çağırıla bilərlər.
Fövqəladə vəziyyət şəraitində hərbi vəzifəlilər üçün 3 ayadək müddətə xüsusi toplanışlar nəzərdə tutulur.
Ehtiyatda olarkən toplanışlarda olmağın ümumi müddəti maksimum 18 aydır.
Müvafiq icra hakimiyyəti orqanının qərarı ilə hərbi vəzifəlilərin toplanışlarda qanunla müəyyən edilmiş müddətdən əlavə 3 ayadək müddətə saxlanması mümkündür.
