Enerji sahəsində yeni qanun imzalandı
Prezident İlham Əliyev “Enerji resurslarından səmərəli istifadə və enerji effektivliyi haqqında” qanunu imzalayıb. Novator.az bildirir ki, qanuna görə, enerji auditi könüllü aparılır, məcburi enerji auditi keçirilməli olan təsərrüfat subyektlərinin və qeyri-yaşayış binalarının siyahısı rəsmən təsdiqlənir. Məcburi enerji auditi 3 ildən bir keçirilir.
Sənədə əsasən, illik enerji istehlakı 1000 ton neft ekvivalentindən çox olan təsərrüfat subyektlərində və tikinti ərazisi ən azı 10000 kvadratmetr və ya illik enerji istehlakı 250 ton neft ekvivalentindən çox olan qeyri-yaşayış binalarında enerji idarəçisi (meneceri) təyin edilməlidir.
Enerji təchizatçıları elektrik enerjisi, təbii qaz, mərkəzi isitmə və soyutma təchizatı və isti məişət suyunun istehlakçılarını ağıllı sayğaclarla təchiz etməyə məsuldur.
Qanun 2022-ci il iyulun 1-dən qüvvəyə minir.
