Dövlət Statistika Komitəsi təbii qazın paylanması üzrə hesabat yayıb. Rəsmi məlumata görə, 2021-ci ilin yanvar-iyun aylarında Azərbaycanın 17 milyard 409,9 milyon kubmetr əmtəəlik təbii qaz ehtiyatı olub. Qazın 35,8 faizinin istehlak olunduğu, 51,7 faizinin ixrac edildiyi, 2,8 faizinin itkiyə getdiyi, 9,7 faizinin ehtiyat kimi qaldığı bildirilir.
Hesabata əsasən, ölkədə istehlak edilmiş təbii qazın 62,2 faizi istehsal ehtiyaclarına sərf olunub, 37,8 faizi əhaliyə satılıb.
Yarım ildə 8 milyard 992,2 milyon kubmetr (2020-ci ilin eyni dövrü ilə müqayisədə 35,1 faiz çox) qaz ixrac edildiyi vurğulanır.
Əhalinin təbii qaz istehlakı 2 milyard 360,3 milyon kubmetr (2020-ci ilin ilk yarısına nəzərən 6,7 faiz çox) göstərilir.
Novator.az bildirir ki, Dövlət Gömrük Komitəsinin rəsmi açıqlamasına görə, 2021-ci ilin yanvar-iyun aylarında Azərbaycan Türkiyə, İtaliya, Gürcüstan, Yunanıstan, Bolqarıstan və İrana ümumilikdə 12 milyard 61,2 milyon kubmetrdən çox qaz ixrac edib.
