Pensiya, müavinət, təqaüd
Əmək və Əhalinin Sosial Müdafiəsi Nazirliyinin hesabatına görə, 2021-ci il iyulun 1-nə Dövlət Sosial Müdafiə Fondunda 1 milyon 214,1 min nəfər pensiyaçı qeydiyyatda olub. Aylıq pensiyanın orta məbləği 328,8 manat göstərilir.
İyulun 1-nə 109,2 min nəfər yaşa görə müavinət alıb, əlilliyi olan 18 yaşından yuxarı 158,5 min nəfərə əlilliyə görə, 48,8 min nəfərə ailə başçısını itirməyə görə, sağlamlıq imkanları məhdud 18 yaşınadək 54,4 min nəfərə müavinət verilib, 23,7 min nəfər digər müavinət növlərindən yararlanıb.
62 min aztəminatlı ailənin 264,1 min üzvünün ünvanlı dövlət sosial yardımı aldığı, onun bir nəfərə düşən orta aylıq məbləğinin 60,06 manata bərabər olduğu vurğulanır.
296,8 min şəxsə prezident təqaüdü təyin olunduğu bildirilir.
İyulun 1-nə 266 nəfər “Xalq” fəxri adına görə, 4415 nəfər “Əməkdar” fəxri adına görə təqaüd alıb.
Novator.az bildirir ki, xalq yazıçısı, xalq şairi, xalq artisti və xalq rəssamı fəxri adları üçün aylıq təqaüdün məbləği 150 manatdır.
Əməkdar elm xadimi, əməkdar incəsənət xadimi, əməkdar artist, əməkdar rəssam, əməkdar mədəniyyət işçisi, əməkdar müəllim, əməkdar həkim, əməkdar memar, əməkdar bədən tərbiyəsi və idman xadimi, əməkdar dövlət qulluqçusu, əməkdar jurnalist, əməkdar mühəndis, əməkdar hüquqşünas, əməkdar kənd təsərrüfatı işçisi, əməkdar pilot, əməkdar tibb işçisi üçün 100 manat aylıq təqaüd müəyyən edilib.
