Yeddi aylıq xarici ticarət
2021-ci ilin yeddi aylıq xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, yanvar-iyul aylarında 11 milyard 393,5 milyon dollarlıq ixrac, 6 milyard 297,9 milyon dollarlıq idxal gerçəkləşib.
175 ölkə ilə ticarət əməliyyatı aparıldığı, gömrük orqanlarının büdcəyə 2 milyard 424 milyon manat vəsait ödədiyi vurğulanır.
Rəsmi məlumata əsasən, ixracın 7,8 faizi MDB ölkələrinin, 54,7 faizi Avropa İttifaqı ölkələrinin, 37,5 faizi başqa ölkələrin payına düşüb.
İdxalda MDB-nin payı 23,7 faiz, Avropa İttifaqının payı 20,1 faiz, başqa ölkələrin payı 56,2 faiz göstərilir.
Yanvar-iyul aylarında əsas tərəfdaş İtaliya olub, bu ölkə ilə ticarət ümumi dövriyyənin 26,1 faizi həcmində rəsmiləşib.
İxracda əsas ölkə İtaliya (ümumi ixracın 38,2 faizi), idxalda Rusiyadır (16,8 faiz).
Hesabata görə, ixracın 88,1 faizi neft-qaz sektoruna daxil olan mallardır.
İdxalda ən böyük pay maşın, mexanizm, elektrik avadanlıqları və onların hissələrinin payına düşür: 24,8 faiz.
Yeddi ayda gömrük orqanları 262 cinayət xarakterli fakt, 10050 inzibati xəta qeydə alıb.
