3000 metr yüksəklikdə
Mod.gov.az-ın 6 avqust məlumatına görə, müdafiə naziri general-polkovnik Zakir Həsənov Kəlbəcər rayonunda inşası davam etdirilən təlim poliqonuna baxış keçirib. Nazirə bildirilib ki, çətin və yüksək dağlıq şəraitində yerləşən hərbi hissələrin şəxsi heyətinin peşəkar hazırlığının yüksəldilməsi məqsədilə hazırlanan poliqonda döyüş şəraitinə tam uyğunlaşdırılmış, relyefin tələblərinə cavab verən təlim məşqləri keçiriləcək.
Zakir Həsənov həmçinin Ermənistan silahlı qüvvələrinin bölmələri ilə üzbəüz mövqelərdə, 3000 metr yüksəklikdə döyüş növbəsi çəkən şəxsi heyətlə görüşüb, müdafiənin dayanıqlığı, hərbi qulluqçuların döyüş və mənəvi-psixoloji hazırlığını yoxlayıb, komanda-müşahidə məntəqəsindən qarşı tərəfin mövqelərini izləyib.
Ermənistan 1988-1994-cü illərin təcavüzündə Azərbaycanın bütün-cənub qərbini işğal edib.
2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-da əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.
Yuxarı Qarabağ bölgəsinin bir hissəsi işğalda qalır, Laçın şəhəri və rayonun 6 kəndi bölgədə atəşkəsə məsul Rusiya hərbçilərinin əlindədir.
