Rəislik başladı
İranın yeni prezidenti İbrahim Rəisi avqustun 5-i Tehranda, ölkə parlamentinin iclasında and içərək səlahiyyətlərinin icrasına başlayıb.
Azərbaycanı mərasimdə Milli Məclisin sədri Sahibə Qafarova, baş nazirin müavini Şahin Mustafayev, xarici işlər nazirinin müavini Fariz Rzayev və başqa rəsmi şəxslər təmsil edib.
Novator.az bildirir ki, İbrahim Rəisi iyunun 18-də keçirilmiş ümumxalq seçkisində qalib olub, avqustun 3-də ali dini lider, dövlət başçısı Əli Xamneyi seçkinin nəticələrini təsdiqləyib.
1960-cı il təvəllüdlü İbrahim Rəisi paytaxt Tehranın prokuroru, ölkənin baş prokuroru, Məhkəmə Sisteminin başçısı olub.
Hökumət başçısı funksiyası daşıyan İran prezidenti 4 il müddətinə seçilir. Prezident vəzifəsinin yaradıldığı 1980-ci ildən bəri həmin kürsünü bu şəxslər tutub: Əbülhəsən Bənisədr, Məhəmmədəli Rəcai, Əli Xamneyi, Haşimi Rəfsəncani, Məhəmməd Xatəmi, Mahmud Əhmədinejad, Həsən Ruhani.
