İqtisadi İslahatların Təhlili və Kommunikasiya Mərkəzinin rəsmi hesabatına əsasən, 2021-ci ilin yanvar-iyul aylarında Azərbaycanın ixracı 11,4 milyard ABŞ dolları dəyərində olub, bunun 1,4 milyard dolları qeyri-neft sektorunun payına düşüb. Qeyri-neft ixracının 2020-ci ilin yeddi ayı ilə müqayisədə 30,5% artdığı vurğulanır.

Yeddi ayda qeyri-neft ixracında meyvə-tərəvəz məhsullarının 338 milyon dollarla önə çıxdığı, qara metallar və onlardan hazırlanan məmulatların ixracında 2,4 dəfə, pambıq ipliyi ixracında 2,8 dəfə, şəkər ixracında 2,3 dəfə, kimya sənayesi məhsulları ixracında 37%, pambıq lifi ixracında 88,5%, alüminium və ondan hazırlanan məmulatların ixracında 42% yüksəliş qeydə alındığı bildirilir.

2016-cı ildə yaradılan İqtisadi İslahatların Təhlili və Kommunikasiya Mərkəzinin əsas missiyası təhlil və tədqiqatlar aparmaqla iqtisadi islahatların həyata keçirilməsi üçün təkliflər, habelə orta və uzun müddətli dövr üçün proqnozlar hazırlamaq, dövlət orqanlarını və qurumlarını həmin proqnozlarla təmin etməkdir.