Paşinyanın hökumətində yeni şəxs
Avqustun 4-də baş nazir Nikol Paşinyanın təqdimatını nəzərə alan Ermənistan prezidenti Armen Sərkisyan Vaahn Xaçaturyanı yüksək texnologiyalar sənayesi naziri təyin edib.
Əvvəlki hökumətdə bu postu Ayk Çobanyan tuturdu.
Novator.az bildirir ki, Vaahn Xaçaturyan 1959-cu ildə doğulub. İqtisadçıdır. Prezidentin müşaviri, paytaxt Yerevanın meri, parlamentin deputatı olub.
Vətəndaş Sazişi Partiyasının sədri Nikol Paşinyan avqustun 2-də yenidən baş nazir postuna yiyələnib. Həmin gün və avqustun 3-də Suren Papikyan və Mger Qriqoryan baş nazirin müavinləri, Arşak Karapetyan müdafiə naziri, Karen Andreasyan ədliyyə naziri, Andranik Piloyan fövqəladə hallar naziri, Vaan Kerobyan iqtisadiyyat naziri, Tiqran Xaçatryan maliyyə naziri, Qnel Sanosyan ərazi idarəçiliyi və infrastruktur naziri, Narek Mkrtçyan əmək və sosial məsələlər naziri, Anait Avanesyan səhiyyə naziri, Vaqram Dumanyan elm, təhsil, mədəniyyət və idman naziri, Romanos Petrosyan ətraf mühit naziri təyin olunub.
Xarici işlər naziri kürsüsü boşdur.
1975-ci il təvəllüdlü Nikol Paşinyan baş nazir postuna 2018-ci il mayın 8-də xalq hərəkatı dalğasında gəlib.
2018-ci il dekabrın 9-da keçirilmiş növbədənkənar parlament seçkisində Nikol Paşinyanın “Mənim addımım” bloku qələbə qazanaraq yenidən hökumət qurub.
2020-ci ilin noyabr ayından bir qrup müxalif partiya baş nazirin istefasını tələb edib. 2021-ci il aprelin 25-də Nikol Paşinyan və hökuməti növbədənkənar parlament seçkisi naminə istefaya gedib. Mayın 10-da qanunverici orqan buraxılıb, iyunun 20-nə növbədənkənar parlament seçkisi təyin olunub. 20 iyun seçkisində Vətəndaş Sazişi Partiyası 107 nəfərlik parlamentə 71 deputat yeri qazanaraq hökumət qurmaq hüququ əldə edib.
Avqustun 2-də yeni parlament fəaliyyətə başlayıb, həmin gün Nikol Paşinyan baş nazir postuna təyinat alıb.
