Deputat həbsə getdi
Avqustun 3-də toxunulmazlığına xitam verilən deputat Eldəniz Səlimov həmin gün Bakıda tutulub, Binəqədi Rayon Məhkəməsi onun barəsində 3 aylıq həbs qətimkan tədbiri seçib.
Novator.az bildirir ki, 1976-cı il təvəllüdlü Eldəniz Səlimov 2015 və 2020-ci illərdə prezident İlham Əliyevin sədrlik etdiyi Yeni Azərbaycan Partiyasının namizədi kimi 55 saylı Xaçmaz şəhər seçki dairəsindən Milli Məclisə mandat alıb.
Eldəniz Səlimov iyulun 29-na keçən gecə Xaçmaz şəhərindəki restoranların birində polis zabitinə zor tətbiq edib. Baş Prokurorluğun İstintaq İdarəsi bu olayı Cinayət Məcəlləsinin 309.2-ci maddəsi ilə araşdırır.
309.2-ci maddəyə əsasən, zor tətbiq etməklə vəzifə səlahiyyətlərini aşma 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 3 ildən 8 ilədək müddətə azadlıqdan məhrumetmə ilə cəzalandırılır.
Azərbaycan Konstitusiyasına görə, deputat yalnız baş prokurorun təqdimatı və Milli Məclisin razılığı ilə cinayət məsuliyyətinə alına bilər.
Avqustun 3-də Milli Məclis Eldəniz Səlimovun deputat toxunulmazlığına xitam verib. Qərar baş prokuror Kamran Əliyevin təqdimatı əsasında qəbul olunub.
Eldəniz Səlimov avqustun 2-də Yeni Azərbaycan Partiyasının üzvlüyündən çıxarılıb. Qərarı Xaçmaz rayon təşkilatının İdarə Heyəti qəbul edib.
