Maliyyə yoxlamalarının nəticələri
Maliyyə Nazirliyinin məlumatına görə, Dövlət Maliyyə Nəzarəti Xidməti 2021-ci ilin ilk yarısında 12 büdcə təşkilatına ayrılan vəsaitlərin təyinatı üzrə xərclənməsini yoxlayıb, 1 büdcə təşkilatının maliyyə-təsərrüfat fəaliyyətini təftiş edib, regional maliyyə müfəttişlikləri bir neçə şəhər və rayonda nəzarət tədbirləri həyata keçirib: “Aparılan nəzarət tədbirləri ilə aşkar olunan 693,5 min manat məbləğində artıq və əsassız ödənişlərin 173,2 min manatının yoxlamaların gedişində bərpası təmin edilib, bir halda tələb olunandan artıq proqnozlaşdırılmış vəsaitin 322,5 min manat məbləğində hissəsi azaldılaraq xərclənməsinin qarşısı alınıb.
23 qurumda aparılan yoxlamalarla aşkar olunan 24 milyon 625,7 min manat məbləğində artıq və əsassız ödənişlərin 1 milyon 303,9 min manatının yoxlamaların gedişində bərpası təmin edilib.
6 qurumda zəruri araşdırmalar aparılıb, 43,9 min manat məbləğində artıq və əsassız ödənişlərə yol verildiyi aşkar olunaraq aparılmış yoxlamaların nəticələri üzrə tərtib edilən sənədlər prokurorluq orqanlarına göndərilib.
Büdcə təşkilatlarında nöqsanlara yol verən 76 nəfər vəzifəli şəxsə 54,4 min manat məbləğində cərimələr tətbiq olunub və həmin cərimələrin dövlət büdcəsinə ödənməsi təmin edilib”.
