Yolun yarısında
İyunun 22-də start götürən 2021-2022 mövsümündə Avropanın klub turnirlərinə 55 UEFA üzvünün 237 komandası buraxılmışdı. Novator.az bildirir ki, iyul ayında tam ələnən 87 komanda üçün mövsüm bitib.
Çempionlar Liqasında ilkin raund, birinci və ikinci mərhələlər arxada qalıb. Üçüncü mərhələdə (3-10 avqust) Xorvatiyadan “Dinamo”, İsveçdən “Malmö”, Bolqarıstandan “Ludoqorets”, Rumıniyadan “Kluj”, Polşadan “Legiya”, Macarıstandan “Ferensvaroş”, Moldovadan “Şerif”, İsveçrədən “Yanq Boyz”, Yunanıstandan “Olimpiakos”, Serbiyadan “Srvena Zvezda”, Niderlanddan PSV, Danimarkadan “Midtülland”, Çexiyadan “Sparta”, “Slaviya”, Şotlandiyadan “Reyncers”, Fransadan “Monako”, Portuqaliyadan “Benfika”, Rusiyadan “Spartak” (Moskva), Belçikadan “Genk”, Ukraynadan “Şaxtyor” mübarizə aparacaq.
Avstriyadan “Zalsburq”, Danimarkadan “Brondbü” dördüncü mərhələyə (17-25 avqust) buraxılıb.
İspaniyadan “Atletiko”, “Real”, “Barselona”, “Sevilya”, “Vilyarreal”, İngiltərədən “Mançester Siti”, “Mançester Yunayted”, “Liverpul”, “Çelsi”, Almaniyadan “Bavariya”, “Leypsiq”, “Borussiya” (Dortmund), “Volfsburq”, İtaliyadan “İnter”, “Milan”, “Atalanta”, “Yuventus”, Fransadan “Lill”, PSJ, Portuqaliyadan “Sportinq”, “Portu”, Rusiyadan “Zenit”, Belçikadan “Brügge”, Ukraynadan “Dinamo”, Niderlanddan “Ayaks”, Türkiyədən “Beşiktaş” rəqibləri qrup raundunda (14 sentyabr-8 dekabr) gözləyir.
Avropa Liqası hələ start götürməyib.
Mübarizəyə Çempionlar Liqasında başlayan Azərbaycan təmsilçisi “Neftçi” birinci raundda Gürcüstanın “Dinamo” (Tbilisi) komandasını ələyib (2:1, 2:1), ikinci raundda Yunanıstan “Olimpiakos”una uduzub (0:1, 0:1). Avropa Liqasına köçən “Neftçi” ilk təsnifat raundunda (5-12 avqust) HİK (Finlandiya) komandası ilə üz-üzə gələcək.
Konfrans Liqasının iki raundu oynanıb. Turnirə ikinci mərhələdən qoşulan Azərbaycan təmsilçilərindən “Keşlə” Rusiyanın “Soçi” komandasına (2:4, 0:3), “Sumqayıt” Serbiyanın “Çukariçki” komandasına (0:2, 0:0) uduzub, “Qarabağ” İsrailin “Aşdod” komandasını ələyib (0:0, 1:0). Üçüncü raundda (5-12 avqust) “Qarabağ” AEL-lə (Kipr) oynayacaq.
Çempionlar Liqasının üçüncü, dördüncü mərhələlərində ələnən və qrup mərhələsində üçüncü yeri tutan komandalar Avropa Liqasına, Avropa Liqasının iki təsnifat raundunda ələnən və qrup mərhələsində üçüncü yeri tutan komandalar Konfrans Liqasına transfer olunacaq.
Azərbaycan klub reytinqində 29-cu pillədədir. Reytinq klub turnirlərində son beş mövsümdə qazanılan əmsala əsaslanır. Təsnifat mərhələlərində qələbə 1 xal, heç-heçə yarım xal, qrup mərhələsində, 1/8 final, 1/4 final, yarımfinal və finalda qələbə 2 xal, heç-heçə 1 xaldır.
Çempionlar Liqasının qrup mərhələsi 4 bonus xalı, 1/8 finalı 5 bonus xalı, 1/4 finalı, yarımfinalı və finalı 1 bonus xalı verir.
Avropa Liqasında qrup qalibi olmağa 4 bonus xalı, qrupda ikinci yeri tutmağa 2 bonus xalı, 1/8 finala, 1/4 finala, yarımfinala və finala adlamağa 1 bonus xalı düşür.
Konfrans Liqasında qrup qalibi olmaq 2 bonus xalı, qrupda ikinci yeri tutmaq 1 bonus xalı, yarımfinal və final 1 bonus xalı qazandırır.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Bu mövsüm Azərbaycan 1,000 əmsal əldə edib.
