Cəbhəçi həbsdən buraxılmadı
İyulun 30-da Xəzər Rayon Məhkəməsi AXCP üzvü Aqil Məhərrəmovun həbsdən vaxtından əvvəl azad edilməsi barədə müraciətinə baxışı yekunlaşdırıb. Müraciət təmin olunmayıb.
Aqil Məhərrəmov Bakıdakı 2 saylı Cəzaçəkmə Müəssisəsində saxlanır. Novator.az-ın məlumatına görə, müəssisə Aqil Məhərrəmova mənfi rəy verib, onun vaxtından əvvəl azadlığa buraxılması barədə müraciətinin təmin olunmamasını istəyib.
Cinayət Məcəlləsi məhkəməyə azadlıqdan məhrumetmə növündə cəza çəkən şəxsi cəzadan şərti olaraq vaxtından əvvəl azad etmək imkanı verir. Cəzadan şərti olaraq vaxtından əvvəl azad etmə üçün məhkumun saxlandığı müəssisənin müsbət rəyi zəruridir.
Aqil Məhərrəmov 2018-ci il mayın 25-dən həbsdədir. Xüsusilə külli miqdarda gəlir əldə etməklə qanunsuz sahibkarlıqda və mütəşəkkil dəstənin cinayət yolu ilə əldə edilmiş külli miqdarda pul vəsaitlərini leqallaşdırmasında təqsirli bilinən cəbhəçi 4 il həbs cəzası alıb.
İttihama görə, 1992-1993-cü illərdə – Azərbaycan Xalq Cəbhəsinin hakimiyyəti vaxtı Gədəbəy Rayon İcra Hakimiyyətinin başçısı vəzifəsində çalışmış, Rusiyada yaşayan iş adamı Saleh Rüstəmov AXCP-ni qanunsuz maliyyələşdirib, Aqil Məhərrəmov və digər şəxslər bu işdə ona yardımçı olublar.
Saleh Rüstəmova 7 il 1 ay, AXCP üzvü Babək Həsənova 3 il azadlıqdan məhrumetmə cəzaları kəsilib, Saleh Rüstəmovun qardaşı oğlu Vidadi Rüstəmli ilə Ruslan Nəsirov (o vaxt AXCP üzvü olub) isə 6 il 8 aylıq şərti cəzalar alıb.
2021-ci il martın 18-də Babək Həsənov prezident sərəncamı ilə əfv edilib.
