Üçdən biri
UEFA Konfrans Liqasında Azərbaycanı təmsil edən komandalar ikinci mərhələnin cavab oyunlarını keçirib. Novator.az-ın məlumatına görə, “Keşlə” iyulun 29-u Bakıda Rusiyanın “Soçi” klubuna 2:4 hesabı ilə yenilib. İlk oyunda da uduzan (0:3) bakılılar turnirdən ələnib.
“Sumqayıt” evdə Serbiyanın “Çukariçki” komandasına 2 cavabsız topla məğlub olub. İlk oyundan qolsuz bərabərliklə ayrılmış “Sumqayıt” mübarizəni dayandırıb.
“Qarabağ” səfərdə İsrailin “Aşdod” komandasına qalib gələrək (1:0) mərhələ adlayıb. Bakıdakı oyunda xallar bölünmüşdü – 0:0.
Üçüncü raundda (5-12 avqust) “Qarabağ” AEL-lə (Kipr) oynayacaq.
Yeni turnir olan Konfrans Liqası dörd təsnifat mərhələsi, qrup raundu, əlavə ələmə mərhələsi, 1/8 final, 1/4 final, yarımfinal və finaldan ibarətdir.
Çempionlar Liqasının ilkin və birinci mərhələlərini tərk edən komandalar Konfrans Liqasına köçüb. Avropa Liqasının təsnifat raundlarında ələnən komandalara da bu imkan veriləcək.
Qruplarda birinci yeri tutan komandalar 1/8 finala keçəcək, ikinci yeri tutan komandalar Avropa Liqasının qruplarında üçüncü olmuş komandalarla 1/8 finala çıxmaq uğrunda əlavə mərhələdə yarışacaq.
