Yeni parlamentə yeni sədr gəlir
Ermənistanın yeni seçilmiş parlamentinin ilk iclası avqustun 2-nə təyin olunub. Novator.az Armeniasputnik.am saytına istinadla bildirir ki, hakim Vətəndaş Sazişi Partiyası parlament sədri postuna Alen Simonyanı namizəd göstərib.
Alen Simonyan 1980-ci ildə doğulub. Yerevan Dövlət Universitetinin hüquq fakültəsini bitirib, Milli Elmlər Akademiyasında siyasi elmlər üzrə magistr dərəcəsi alıb.
Əsası 2013-cü ildə qoyulan Vətəndaş Sazişi Partiyasının öncül şəxslərindən biridir. 2019-cu ildən parlament sədrinin müavini postunu tutub.
Bundan əvvəlki parlamentə Ararat Mirzoyan sədrlik edib. 1979-cu il təvəllüdlü Ararat Mirzoyan tarixçi alimdir. 2017-ci ildə parlamentin deputatı seçilib, 2018-2019-cu illərdə baş nazirin birinci müavini olub. Vətəndaş Sazişi Partiyasının öncül şəxslərindəndir.
İyunun 20-də keçirilmiş növbədənkənar seçkidə formalaşan yeni parlament 107 deputatdan ibarətdir. Baş nazir səlahiyyətlərini icra edən Nikol Paşinyanın Vətəndaş Sazişi Partiyası parlamentə 71 mandatla düşüb. İkinci prezident Robert Köçəryanın, Daşnaksütun Partiyası və Dirçələn Ermənistan Partiyasının cəmləşdiyi Ermənistan blokunun 29, üçüncü prezident Serj Sərkisyanın Ermənistan Respublikaçılar Partiyasını Milli Təhlükəsizlik Xidmətinin sabiq direktoru Artur Vanetsyanın Vətən Partiyası ilə birləşdirən “Qürurluyam” blokunun 7 mandatı var.
20 iyun seçkisində qələbə ilə Vətəndaş Sazişi Partiyası təkbaşına hökumət qura bilir.
Ermənistanda hökumətin strukturu qanunla müəyyən olunur, baş naziri və Nazirlər Kabinetinin başqa üzvlərini prezident təyin edir.
