Rəqəmlər içində
Maliyyə Nazirliyinin hesabatına görə, 2021-ci ilin ilk yarısında dövlət büdcəsinə vergi orqanından proqnoza nisbətən 851,6 milyon manat, gömrükdən proqnoza nisbətən 259,7 milyon manat çox vəsait daxil olub, icmal büdcədə 2 milyard 576,5 milyon manat artıqlıq yaranıb. Novator.az-ın məlumatına görə, bu rəqəmlərə diqqət çəkən Demokratik Qüvvələrin Milli Şurasının sədri Cəmil Həsənli yazır ki, yanvar-iyun aylarında Azərbaycanda işsizlər ordusunun sayı daha 60 min nəfər artıb: “2020-ci il ərzində 49,4 faiz artmış işsizlik səviyyəsinə bu ilin 6 ayında daha 18 faiz əlavə olunub”.
Prezident İlham Əliyevin yarım illik iqtisadi göstəricilər barədə “Hər bir ölkə bizim göstəricilərlə fəxr edə bilər” deməsinə toxunan Cəmil Həsənli qeyd edir ki, 120-150 dollar arası aylıq pensiya, 150-200 dollar arası aylıq əməkhaqqı ilə fəxr etmək mümkünsüzdür: “Bu ilin altı ayı ərzində ölkədə qazın, işığın, suyun və digər kommunal xidmətlərin qiyməti, cərimə və rüsumlar nə qədər artıb? Deyəsən, bu barədə danışmaq elə də xoş deyil. Yarım ildə idxal malları 27 faiz, ümumi məhsul bazarı 20 faiz, istehlak bazarları 16 faiz bahalaşıb və bu bahalaşma fonunda orta aylıq əməkhaqqı mayın 1-nə 2 faizə yaxın aşağı düşüb. Bu ilin altı ayı da daxil olmaqla son 5-6 ildə Azərbaycan iqtisadiyyatına qoyulan investisiyaların həcmi də azalma xətti ilə gedir”.
