Diplomatik korpusda dəyişikliklər
İyulun 23-də prezident İlham Əliyev diplomatik korpus üzrə sərəncamlar imzalayıb.
Vilayət Muxtar oğlu Quliyev Macarıstanda səfir vəzifəsindən geri çağırılıb, Tahir Tofiq oğlu Tağızadə Böyük Britaniya, İrlandiya, İslandiya və Danimarkada səfir postundan Macarıstanda səfir vəzifəsinə keçirilib.
Qaley Əliyeviç Allahverdiyev Malayziya, Myanma, Tailand və Bruneydə, Qalib Malik oğlu İsrafilov Avstriya, Sloveniya və Slovakiyada səfir vəzifələrindən götürülüb. Qalib İsrafilov BMT-nin Vyana şəhərindəki bölməsində, Avropada Təhlükəsizlik və Əməkdaşlıq Təşkilatı, BMT-nin Sənaye İnkişafı Təşkilatı, Nüvə Enerjisi üzrə Beynəlxalq Agentliyi və Nüvə Sınaqlarının Tamamilə Qadağan Olunması üzrə Müqavilə Təşkilatı yanında daimi nümayəndə vəzifəsindən də geri çağırılıb.
İrfan Şakir oğlu Davudov Malayziyaya, Kamil Tacid oğlu Xasiyev Serbiyaya səfir təyin edilib.
Avstriyada səfir postu Rövşən Nüsrət oğlu Sadıqbəyliyə verilib. O həmçinin Azərbaycanı BMT-nin Vyana şəhərindəki bölməsində, Avropada Təhlükəsizlik və Əməkdaşlıq Təşkilatı, BMT-nin Sənaye İnkişafı Təşkilatı, Nüvə Enerjisi üzrə Beynəlxalq Agentliyi və Nüvə Sınaqlarının Tamamilə Qadağan Olunması üzrə Müqavilə Təşkilatı yanında daimi nümayəndə kimi təmsil edəcək.
Vilayət Quliyev 1999-cu il oktyabrın 26-dan 2004-cü il aprelin 2-dək xarici işlər naziri olub.
