AZPROMO fərmanı, tapşırıqlar
İyulun 23-də prezident İlham Əliyev Azərbaycan Respublikasının İxracın və İnvestisiyaların Təşviqi Agentliyinin (AZPROMO) statusu ilə bağlı fərman imzalayıb. Novator.az bildirir ki, təsdiqlənən nizamnaməyə görə, AZPROMO ixracın və investisiyaların təşviq edilməsi istiqamətində fəaliyyət göstərən, ixracatçılara və investorlara bir sıra xidmətlər göstərən publik hüquqi şəxsdir. Agentlik İqtisadiyyat Nazirliyinin tabeliyindədir.
AZPROMO-nun nizamnamə fondu 1 milyon manat müəyyən edilib.
Nazirlər Kabinetinə agentliyin fəaliyyətinin maliyyələşdirilməsi mexanizmi ilə bağlı təkliflərini üç ay müddətində təqdim etmək, ixracatçılara və investorlara göstərilən xidmətlərin siyahısını bir ay müddətində təsdiqləmək tapşırılıb.
İqtisadiyyat Nazirliyi agentliyin işçilərinin say həddini və əmək haqlarının məbləğini bir ay müddətində təsdiq etməlidir.
2003-cü ildən indiki İqtisadiyyat Nazirliyinin tərkibində Azərbaycanda İxracın və İnvestisiyaların Təşviqi Fondu (AZPROMO) fəaliyyət göstərib.
