6 ayın hesabatı
Baş Prokurorluğun hesabatına görə, 2021-ci ilin birinci yarısında əməliyyat-axtarış və istintaq fəaliyyətini həyata keçirən bütün dövlət orqanları üzrə 14 min 928 cinayət qeydə alınıb, keçmiş illərdən bağlı qalmış 207 cinayətin açılması təmin edilib, 435 cinayətkar qrup zərərsizləşdirilib, cinayətlərin 88,7%-i açılıb.
Rəsmi məlumata əsasən, 8197 cinayət işinin istintaqı tamamlanıb, 6399 cinayət işinin ittiham aktları ilə məhkəmələrə göndərilməsi təmin edilib.
Qeyd olunur ki, ibtidai istintaqı tamamlanmış cinayət işləri üzrə ümumilikdə 174 milyon 62 min manat məbləğində maddi ziyan vurulduğu bilinib, istintaq tədbirləri ilə onun 51,5 faizinin, ödənməsinə nail olunub, icraatına xitam verilmiş cinayət işləri üzrə cinayət məsuliyyətindən azad olunmuş şəxslər dövlət büdcəsinə 668 min 949 manat ödəyib.
Hesabata əsasən, korrupsiya hüquqpozmasına yol vermiş 267 şəxs barəsində 155 cinayət işinin istintaqı tamamlanaraq baxılması üçün məhkəmələrə göndərilib, 8 milyon 785 min manat məbləğində ziyanın ödənməsi təmin edilib, təqsirləndirilən şəxslərin dövlət büdcəsinə 1 milyon 952 min manat ödəməsi ilə 44 milyon manat dəyərində əmlakın üzərinə həbs qoyulub.
