Mərhələ necə yarılandı?
UEFA Konfrans Liqasında Azərbaycanı təmsil edən komandaların ikinci mərhələdəki ilk oyunları arxada qalıb. Novator.az-ın məlumatına görə, “Keşlə” iyulun 22-si Rusiyada “Soçi”yə 0:3 hesabı ilə yenilib.
“Qarabağ” Bakıda İsrailin “Aşdod” komandası ilə xalları bölüb – 0:0.
Turnirdəki digər Azərbaycan komandası “Sumqayıt” iyulun 21-i Serbiyada “Çukariçki” ilə oyundan qolsuz bərabərliklə ayrılmışdı.
Cavab matçları iyulun 29-na təyin olunub.
Üçüncü raunda (5-12 avqust) çıxacaqları halda “Keşlə” “Partizan” (Serbiya) – “Dunayska Streda” (Slovakiya) cütlüyünün qalibi, “Qarabağ” AEL (Kipr) – “Vlajniya” (Albaniya) cütlüyünün qalibi, “Sumqayıt” “Hammarbü” (İsveç) – “Maribor” (Sloveniya) cütlüyünün qalibi ilə oynayacaq.
Yeni turnir olan Konfrans Liqası dörd təsnifat mərhələsi, qrup raundu, əlavə ələmə mərhələsi, 1/8 final, 1/4 final, yarımfinal və finaldan ibarətdir.
Çempionlar Liqasının ilkin və birinci mərhələlərini tərk edən komandalar Konfrans Liqasına köçüb. Avropa Liqasının təsnifat raundlarında ələnən komandalara da bu imkan veriləcək.
Qruplarda birinci yeri tutan komandalar 1/8 finala keçəcək, ikinci yeri tutan komandalar Avropa Liqasının qruplarında üçüncü olmuş komandalarla 1/8 finala çıxmaq uğrunda əlavə mərhələdə yarışacaq.
