Moskvada görüş
İyulun 20-də prezident İlham Əliyev rusiyalı həmkarı Vladimir Putinin dəvəti ilə Moskvaya işgüzar səfər edib. Dövlət başçıları Kremldə bir araya gəlib. Görüşdə ikitərəfli münasibətlərə toxunulub, iqtisadi sahədə, koronavirus infeksiyası ilə mübarizədə əməkdaşlıq məsələləri müzakirə olunub, həmçinin bölgədə 2020-ci ilin payızından sonra yaranmış vəziyyət nəzərdən keçirilib.
İlham Əliyev Rusiya prezidentinin şəxsi səylərinin hərbi əməliyyatların bitməsindən ötən səkkiz ayda vəziyyətin sabitləşməsində mühüm rol oynadığını deyib, Azərbaycanın münaqişədən sonrakı dövrün mümkün qədər ağrısız keçməsində qərarlı olduğunu qeyd edib.
Vladimir Putin bölgədə vəziyyətin nizamlanması üçün kompromis qərarları vacib saydığını deyib və İlham Əliyevin bu yöndə səylərini yüksək qiymətləndirdiyini vurğulayıb.
Ermənistan 1988-1994-cü illərin təcavüzündə Azərbaycanın Yuxarı Qarabağ vilayətini və onun ətrafındakı bölgələri işğal edib.
2020-ci il sentyabrın 27-dən Azərbaycanın keçirdiyi hərbi əməliyyatlarda ərazilərin bir hissəsi azad olunub.
Noyabrın 10-na keçən gecə Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin birgə bəyanat imzalayıblar.
Bəyanata əsasən, hərbi əməliyyatlar dayandırılıb, Yuxarı Qarabağa və bölgəni Ermənistanla birləşdirən Laçın yoluna Rusiyanın hərbi kontingenti yeridilib.
Ermənistan dekabrın 1-dək ərazilərin daha bir qismini Azərbaycana qaytarıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi bölgədə atəşkəsə məsul Rusiya Ordusu bölmələrinin əlindədir.
10 noyabr 2020-ci il razılaşması bölgədəki bütün iqtisadi əlaqələrin və nəqliyyat əlaqələrinin bərpasını da nəzərdə tutub. Birgə bəyanata görə, Ermənistan Azərbaycanın qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verməlidir.
2021-ci il yanvarın 11-i Moskvada görüşən İlham Əliyev, Nikol Paşinyan və Vladimir Putin daha bir bəyanat imzalayıblar. Bəyanata əsasən, regionda bütün iqtisadi əlaqələrin və nəqliyyat əlaqələrinin bərpasını reallaşdırmaq məqsədilə üç ölkənin baş nazirlərinin müavinlərinin həmsədrliyi ilə işçi qrup yaradılıb.
