Ermənistan: müdafiə naziri səlahiyyətlərinin icraçısı istefa verdi
Ermənistan müdafiə nazirinin səlahiyyətlərini icra edən Vaqarşak Arutyunyan iyulun 20-də istefa verib.
Novator.az bildirir ki, Vaqarşak Arutyunyan 1956-cı ildə Gürcüstanda anadan olub. Bakıdakı Xəzər Ali Hərbi Dəniz Məktəbini, Hərbi Dəniz Akademiyasını (Sankt-Peterburq) və SSRİ Silahlı Qüvvələri Baş Qərargahının Hərbi Akademiyasını (Moskva) bitirib.
1978-1990-cı illərdə Rusiyanın Uzaq Şərq bölgəsində xidmət edib.
1991-1992-ci illərdə Ermənistan daxili işlər nazirinin müavini, Müdafiə Komitəsi sədrinin birinci müavini postlarını tutub.
1992-1994-cü illərdə MDB Birləşmiş Hərbi Qüvvələri Baş Komandanlığında qərargah rəisinin müavini, 1994-1999-cu illərdə MDB Müdafiə Nazirləri Şurasında Ermənistanın nümayəndəsi, 1999-2000-ci illərdə Ermənistanın müdafiə naziri olub.
2020-ci ilin avqustundan baş nazirin böyük müşaviri postunu tutan Vaqarşak Arutyunyan həmin il noyabrın 20-dən müdafiə naziri idi.
İyulun 20-də baş nazir səlahiyyətlərinin icraçısı Nikol Paşinyan Arşak Karapetyanı müdafiə nazirinin birinci müavini təyin edib. Bu təyinata qədər Silahlı Qüvvələrin Baş Qərargahı rəisinin müavini olmuş Arşak Karapetyanın müdafiə naziri səlahiyyətlərini icra edəcəyi bildirilir.
Mənbə: Armeniasputnik.am
Ermənistanda iyunun 20-də keçirilmiş parlament seçkisinin rəsmi nəticələri baş nazir səlahiyyətlərinin icraçısı Nikol Paşinyana yenidən hökumət qurmaq imkanı verir.
1975-ci il təvəllüdlü Nikol Paşinyan Vətəndaş Sazişi Partiyasının lideridir. 2017-ci il aprelin 2-də bu partiyanın daxil olduğu “Çıxış” bloku qanunverici orqana 9 mandat qazanıb.
2018-ci il aprelin 9-da Ermənistan parlament idarə üsuluna keçib: icra hakimiyyətinin ali orqanı funksiyası Nazirlər Kabinetinə, dövlət idarəçiliyinə rəhbərlik baş nazirə ötürülüb.
2008-ci ildən prezident postunu tutmuş Serj Sərkisyan 2018-ci il aprelin 17-də baş nazir postuna oturub, ancaq aprelin 23-də xalq etirazları səbəbindən istefa verib. Mayın 8-də baş nazir postuna etirazların lideri Nikol Paşinyan gətirilib. O, həmin il oktyabrın 16-da istefa verib (ancaq səlahiyyətlərinin icrasını davam etdirib), ardınca parlament buraxılıb. Dekabrın 9-da keçirilmiş növbədənkənar parlament seçkisində onun liderlik etdiyi blok qalib gəlib, 2019-cu il yanvarın 14-də Nikol Paşinyan yenidən baş nazir postuna təyinat alıb.
2020-ci ilin noyabr ayından bir qrup müxalif partiya baş nazirin istefasını tələb edib. 2021-ci il aprelin 25-də Nikol Paşinyan və hökuməti növbədənkənar parlament seçkisi naminə istefaya gedib. Mayın 10-da qanunverici orqan buraxılıb, iyunun 20-nə növbədənkənar parlament seçkisi təyin olunub.
20 iyun seçkisinin nəticələrinə əsasən, Vətəndaş Sazişi Partiyası 107 yerlik yeni parlamentə 71 mandatla düşüb, ikinci prezident Robert Köçəryanın, Daşnaksütun Partiyası və Dirçələn Ermənistan Partiyasının cəm olduğu Ermənistan bloku 29 mandat, üçüncü prezident Serj Sərkisyanın sədrlik etdiyi Ermənistan Respublikaçılar Partiyasını Milli Təhlükəsizlik Xidmətinin sabiq direktoru Artur Vanetsyanın Vətən Partiyası ilə birləşdirən “Qürurluyam” bloku 7 mandat götürüb.
Hazırda Nikol Paşinyan, onun müavinləri, nazirlər və başqa hökumət üzvləri səlahiyyətlərin icraçısı sayılır.
