Moldovada mandat bölgüsü
Moldovanın Mərkəzi Seçki Komissiyası iyulun 11-də keçirilmiş növbədənkənar parlament seçkisinin nəticələrini təsdiqləyib. Novator.az bildirir ki, iyulun 19-da verilən qərara görə, prezident Mayya Sanduya bağlı Hərəkət və Həmrəylik Partiyası 101 nəfərlik parlamentə 63 mandat əldə edir.
Kommunist və Sosialist partiyalarını birləşdirən blokun qanunverici orqana 32, Şor Partiyasının 6 deputatla düşdüyü açıqlanıb.
11 iyul seçkisinin nəticələri ilə bağlı yekun qərarı Konstitusiya Məhkəməsi verməlidir.
Moldova parlament respublikasıdır. Ölkədə hökuməti qanunverici orqanda mandatların yarıdan çoxuna sahib olan siyasi qüvvə qurur.
Növbədənkənar parlament seçkisinə dövlət başçısının təşəbbüsü ilə gedilib.
1972-ci il təvəllüdlü Mayya Sandu 2020-ci il noyabrın 15-də Hərəkət və Həmrəylik Partiyasının lideri olaraq Moldova prezidenti seçilib. O, 2012-2015-ci illərdə maarif naziri, 2019-cu ilin iyun-noyabr aylarında baş nazir postunu tutub.
Mənbə: Sputnik.md
