Azərbaycan komandalarının mümkün rəqibləri
UEFA-nın klub turnirlərində Azərbaycanı təmsil edən komandaların yeni mümkün rəqibləri bəlli olub. Novator.az bildirir ki, iyulun 19-da atılan püşkə əsasən, Çempionlar Liqasında yarışan “Neftçi” ikinci raundda (20-28 iyul) Yunanıstandan “Olimpiakos”u keçəcəyi halda üçüncü mərhələdə (3-10 avqust) “Mura” (Sloveniya) – “Ludoqorets” (Bolqarıstan) cütlüyünün qalibi ilə görüşəcək.
Ələnəcəyi halda Avropa Liqasına köçən “Neftçi” ilk təsnifat raundunda (5-12 avqust) “Malmö” (İsveç) – HİK (Finlandiya) cütlüyünün məğlubu ilə üz-üzə gələcək.
Konfrans Liqasında yer alan “Keşlə”, “Qarabağ” və “Sumqayıt” turnirə ikinci mərhələdən (22-29 iyul) başlayır. “Keşlə”yə Rusiyadan “Soçi”, “Qarabağ”a İsraildən “Aşdod”, “Sumqayıt”a Serbiyadan “Çukariçki” qismət olub. 19 iyul püşkünə görə, mərhələ keçəcəyi halda üçüncü raundda (5-12 avqust) “Keşlə” “Partizan” (Serbiya) – “Dunayska Streda” (Slovakiya) cütlüyünün qalibi, “Qarabağ” AEL (Kipr) – “Vlajniya” (Albaniya) cütlüyünün qalibi, “Sumqayıt” “Hammarbü” (İsveç) – “Maribor” (Sloveniya) cütlüyünün qalibi ilə oynayacaq.
