Azərbaycan Avropa Məhkəməsinin liderlər qrupunda
Avropa İnsan Hüquqları Məhkəməsinə şikayətlər üzrə statistika açıqlanıb. Novator.az-ın məlumatına görə, hüquqşünas Xalid Ağalıyev yazır ki, 2021-ci il iyunun sonuna Avropa Məhkəməsində 65800 ərizə qərar gözləyib: “Bu ərizələrin 89 faizi Rusiya, Türkiyə, Ukrayna, Rumıniya, İtaliya, Polşa, Azərbaycan, Serbiya, Yunanıstan və Ermənistanın payına düşüb. Rusiya qərar gözləyən ərizələrin sayında lider olub – 14350 ərizə. Sonrakı pillədə 13950 ərizə ilə Türkiyə dayanıb.
Qərar gözləyən ərizələrin 10800-ü Ukraynadan, 6700-ü Rumıniyadan, 3700-ü İtaliyadan, 2150-si Polşadan göndərilib.
Azərbaycan 7-ci sırada yer alıb – 2100 ərizə.
2021-ci il iyunun sonuna Serbiyadan 1850, Yunanıstandan 1400, Ermənistandan 1300 ərizə qərar növbəsində olub.
Avropa İnsan Hüquqları Məhkəməsinin yurisdiksiyasındakı qalan 37 ölkədən ümumilikdə 7500 ərizə qərar verilməsini gözləyib”.
Hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub.
