Şuşa yolunda
Azərbaycan Avtomobil Yolları Dövlət Agentliyinin 16 iyul məlumatına görə, Füzuli rayonundan Şuşa şəhərinə çəkilən ikinci avtomobil yolu boyunca tunellərin inşasına start verilib: “Çətin relyefli ərazilərdə, dolaylarda inşa ediləcək körpü və tunellər hesabına yolun uzunluğu 84,6 kilometr olacaq.
Yol boyu ümumilikdə 7 tunel tikilir. Tunellərin bir istiqamət üzrə 2 hərəkət zolaqlı və 12 metr enində olması nəzərdə tutulur. Uzunluqları 360-3300 metr arası dəyişəcək tunellərin giriş hissəsində aparılan işlər tamamlanıb.
4 və 6 hərəkət zolaqlı olmaqla inşa edilən Əhmədbəyli-Füzuli-Şuşa avtomobil yolunun 0-3, 34-37 və 51-53-ci kilometrlik hissələrində torpaq yatağının inşası işləri yekunlaşıb”.
Füzuli rayonundan Şuşa şəhərinə çəkilən 101 kilometrlik başqa yolun 2 hərəkət zolaqlı olması nəzərdə tutulur.
1988-1994-cü illərin təcavüzündə Ermənistan Azərbaycanın bütün cənub-qərbini işğal edib.
Azərbaycan Silahlı Qüvvələrinin 2020-ci il sentyabrın 27-dən apardığı əməliyyatlarda və 10 noyabr atəşkəsində əldə olunan razılaşma nəticəsində ərazilərin böyük qismi azad edilib.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi bölgədə atəşkəsə məsul olan Rusiya Ordusu bölmələrinin əlindədir.
Əsası 1750-ci ildə qoyulan Şuşa şəhəri 1992-ci il mayın 8-9-dan 2020-ci il noyabrın 8-dək işğalda olub.
Hələlik Şuşaya Laçın və Ağdam yolları ilə gedib-gəlmək mümkün deyil. Xocavənd-Şuşa yolundan isə Rusiya hərbçilərinin müşayiəti ilə istifadə olunur.
