Artım və azalmalar
Dövlət Statistika Komitəsi 2021-ci il iyulun 1-nə iqtisadi fəal əhalinin 4 milyon 929,1 min nəfərini məşğul əhali kimi göstərib. Novator.az bildirir ki, hesabata görə, iyunun 1-nə muzdlu işçilərin sayı 1 milyon 677,6 min nəfər olub, onların 32,1 min nəfəri neft-qaz sektorunda, 1 milyon 645,5 min nəfəri qeyri neft-qaz sektorunda çalışıb.
2021-ci ilin ilk yarısında statistik vahidlərin (fərdi sahibkarlar istisna olmaqla) sayının 161 min, fərdi sahibkarların sayının 1 milyon 100 min nəfəri keçdiyi qeyd olunur.
Statistikaya əsasən, yanvar-iyun aylarında ictimai iaşə dövriyyəsi 2020-ci ilin eyni dövrü ilə müqayisədə 4,5 faiz azalıb, əhaliyə göstərilmiş ödənişli xidmətlərdən əldə olunan gəlir 2,3 faiz artıb.
Qeyd olunur ki, yarım ildə ölkənin iqtisadi və sosial sahələrinə qoyulan 5 milyard 919,4 milyon manatlıq sərmayənin 68,7 faizi məhsul istehsalı sahələrinin, 23,4 faizi xidmət sahələrinin 7,9 faizi yaşayış evlərinin tikintisinin payına düşüb.
Yanvar-may aylarında xarici ticarət dövriyyəsinin ötən ilin eyni dövrü ilə müqayisədə faktiki qiymətlərlə 21,3 faiz artdığı, real ifadədə 10,2 faiz, o cümlədən idxalın 13,4 faiz, ixracın 7,8 faiz azaldığı bildirilir.
