Şuşa ətrafında
İyulun 13-ü axşamı Azərbaycan Ordusunun Şuşa şəhəri ətrafındakı mövqeləri pulemyot və avtomatlardan atəşə tutulub. Eyni hal iyulun 15-də yaşanıb. Müdafiə Nazirliyinin məlumatına görə, gecə saatlarında Şuşa şəhəri ətrafındakı mövqelərə atıcı silahlardan atəşi Rusiya sülhməramlılarının nəzarətində olan ərazidəki qanunsuz erməni silahlı dəstələri açıb, buna cavab atəşi ilə reaksiya verilib.
Novator.az bildirir ki, 1988-ci ildə Ermənistan Azərbaycanın Dağlıq Qarabağ bölgəsini ələ keçirmək üçün təcavüzə başlayıb. 1991-ci ildə Dağlıq Qarabağ “müstəqil dövlət” elan edilib. Bunun ardınca müharibə alovlanıb. 1994-cü ildə atəşkəslə dayanan müharibədə Ermənistan Azərbaycanın bütün cənub-qərbini işğal edib.
2020-ci il sentyabrın 27-dən Azərbaycan Silahlı Qüvvələrinin apardığı hərbi əməliyyatlarda və noyabrın 10-da Rusiyanın vasitəçiliyi ilə əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad edilib.
Dağlıq Qarabağ bölgəsində və Ermənistana gedən Laçın yolunda Rusiyanın sülhməramlı hərbi kontingenti yerləşdirilib. Bu kontingentin bölgədə qalma müddətinin 5 il olduğu açıqlanıb.
Şuşa şəhəri 2020-ci il noyabrın 8-də işğaldan azad edilib. Rayonun Daşaltı kəndi də Azərbaycanın əlindədir.
