Rusiya peyvəndinin Avropa Birliyində qeydiyyatı niyə gecikir?
ABŞ-ın “Reuters” agentliyi Rusiyanın koronavirus əleyhinə hazırladığı əsas peyvəndin – “Sputnik V”in Avropa Birliyində qeydiyyatının gecikmə səbəbini araşdırıb.
Novator.az saytının məlumatına görə, “Reuters” etibarlı mənbələrə istinadla yazıb ki, “Sputnik V” peyvəndinin istehsalçıları vaksinə dair lazımi sənədlərin hamısını vaxtında Avropa Dərman Agentliyinə (EMA) təqdim etməyiblər. Ona görə də vaksinin Avropa Birliyində qeydiyyatı yayın sonunadək uzana bilər.
Söhbət xüsusilə vaksinin hüceyrə bankına, yəni bünövrəsinə aid sənəddən gedir. Bu, vaksinin Avropa Birliyinin müəyyənləşdirdiyi normalara uyğun olduğunu sübut etmək üçün vacib sənədlərdən biridir.
“Reuters”ə danışan mənbə bildirib ki, “Sputnik V”i Avropa Birliyində qeydiyyata almaq üçün təhlillər başlananda EMA-nın əlində vaksinin yan təsirlərinə aid məlumatlar olmayıb. “Sputnik V” istehsalçılarının kliniki sınaqlar zamanı peyvəndlənmiş insanlar üzərində nə dərəcədə müşahidə apardıqlarını da EMA tam aydınlaşdıra bilməyib.
Ancaq mənbə qeydiyyat qaydalarının faciəvi həddə pozulmadığını vurğulayıb, bildirib ki, sadəcə anlaşılmaz məqamlara aydınlıq gətirməyə ehtiyac yaranıb. Həmin məqamları aydınlaşdırmaq üçün isə hələ xeyli iş görülməlidir.
Avropa Birliyində Rusiya peyvəndinin qeydiyyatı prosesi ilə bağlı məlumatlı olan başqa bir mənbə “Reuters”ə açıqlamasında deyib ki, əslində EMA “Sputnik V”in təsirli və təhlükəsiz bir peyvənd olduğuna şübhə etmir.
Rusiyada peyvənd istehsalını maliyyələşdirən Birbaşa İnvestisiyalar Fondu “Sputnik V”ə dair bəzi sənədlərin vaxtında EMA-ya çatdırılmadığı haqda iddiaları təkzib edib. “Reuters”i anonim mənbələrə söykənməkdə qınayan fond bəyan edib ki, müəyyən dairələr “Sputnik V” peyvəndini gözdən salmağa çalışır, dezinformasiya kampaniyası aparır.
Birbaşa İnvestisiyalar Fondu “Sputnik V”in hüceyrə bankının Avropa Birliyinin müəyyənləşdirdiyi normalara, EMA-nın tələblərinə tam cavab verdiyini vurğulayıb.
Xatırladaq ki, Rusiyada koronavirus əleyhinə daha iki peyvənd istehsal olunub: “EpiVacCorona” və “CoviVac”.
Mənbə: Reuters.com
