Müsavatdan tələblər
Müsavat Partiyası Ermənistan silahlı qüvvələrinin Qarabağda, Azərbaycan sərhədində, eləcə də Naxçıvan Muxtar Respublikası istiqamətində atəşkəsi vaxtaşırı pozmasına münasibət bildirib. Novator.az-ın məlumatına görə, partiyanın 14 iyul bəyanatında qeyd olunur ki, 10 noyabr 2020-ci ildə imzalanan üçtərəfli sənəd Ermənistan ordusunun Qarabağdan çıxmasını nəzərdə tutsa da, buna əməl edilmir: “Azərbaycan Ordusunun mövqelərinin son dövrlər dəfələrlə atəşə tutulması Ermənistanın 44 günlük müharibənin nəticələrini unutduğunu və yenidən azğınlaşdığını göstərir. Müsavat Partiyası Azərbaycan hakimiyyətinin bu məsələdə susqunluğunu qətiyyətlə pisləyir, qanunsuz hərbi birləşmələrin Azərbaycan ərazisindən çıxarılması istiqamətində təsirli tədbirlər görülməsini tələb edir.
Partiya hesab edir ki, atəşkəsin pozulması hallarına Türkiyə-Rusiya müşahidə missiyası rəsmi münasibət bildirməli, bu təsisat ümumilikdə atəşkəs rejiminə əməl olunmasına dair funksiyalarını yerinə yetirməlidir”.
Ermənistan 1988-1994-cü illərin təcavüzündə Azərbaycanın bütün cənub-qərbini ələ keçirib.
2020-ci il sentyabrın 27-dən Azərbaycanın apardığı hərbi əməliyyatlarda ərazilərin böyük hissəsi azad olunub.
Noyabrın 10-na keçən gecə Azərbaycan prezidenti İlham Əliyev, Ermənistanın baş naziri Nikol Paşinyan və Rusiya prezidenti Vladimir Putin birgə bəyanat imzalayıb. Hərbi əməliyyatlar dayandırılıb, Yuxarı Qarabağa və Ermənistana gedən Laçın yoluna Rusiyanın sülhməramlı kontingenti yerləşdirilib.
Dekabrın 1-dək ərazilərin daha bir hissəsi Azərbaycana qaytarılıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.
Laçın şəhəri və rayonun 6 kəndi Rusiya Ordusu bölmələrinin əlindədir.
2021-ci il yanvarın 30-u Ağdam rayonunda Türkiyə-Rusiya Birgə Monitorinq Mərkəzi açılıb. Qurum atəşkəsə nəzarət edir.
10 noyabr 2020-ci il bəyanatına görə, Rusiyanın sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi. Ancaq Azərbaycanın nəzarətindən kənar qalan ərazilərdə erməni silahlı qüvvələri var.
Müsavat Partiyası 1911-ci ildə yaradılıb. Partiyanın ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran, beşinci başqanı İsa Qəmbər olub. 2014-cü ildən partiyaya Arif Hacılı başqanlıq edir.
