Dövlətə cərimə: Tofiq Yaqubluya 9 min avro verilməlidir
Avropa İnsan Hüquqları Məhkəməsi iyulun 15-də azərbaycanlı siyasətçi Tofiq Yaqublunun iki şikayəti üzrə qərarını elan edib. Novator.az hüquqşünas Xalid Ağalıyevə istinadla bildirir ki, məhkəmə inzibati məsuliyyətə cəlb edilmiş Tofiq Yaqublunun Avropa İnsan Hüquqları Konvensiyası ilə təminat verilən azadlıq və toxunulmazlıq və ədalətli məhkəmə araşdırması hüquqlarının pozulduğu qənaətinə gəlib. Qərar Azərbaycan dövlətinin Tofiq Yaqubluya 9 min avro təzminat ödəməsini nəzərdə tutur.
Avropa Məhkəməsinə göndərilmiş şikayətlər Tofiq Yaqublunun 2012-ci il mayın 24-ü və 25-də tutulması ilə bağlıdır.
Ərizəçi 2012-ci il mayın 24-də, müxalif qüvvələrin aksiyasından bir gün əvvəl Bakının Suraxanı rayonunda tutulub, ona 20 manat cərimə kəsilib. Mayın 25-də Bakı metrosunun “Sahil” stansiyasının yaxınlığında yenidən tutulan Tofiq Yaqublu bir gün polisdə saxlanıb, 20 manat cəriməyə məruz qalıb.
Siyasətçi hər iki iş üzrə milli məhkəmələrdə çəkişmə aparıb, amma şikayətləri rədd edilib.
Hakimləri Avropa Şurasına üzv ölkələrdən seçilən Avropa Məhkəməsi Avropa İnsan Hüquqları Konvensiyasına riayət olunmasına nəzarət edir.
Azərbaycan 1949-cu ildə yaradılmış Avropa Şurasına 2001-ci ildə qoşulub.
1961-ci il təvəllüdlü Tofiq Yaqublu milli azadlıq hərəkatının (1988-1991) fəalı, Qarabağ müharibəsi veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb. 1992-ci ildən Müsavat Partiyasının üzvüdür. 2010-2018-ci illərdə partiya başqanının müavini postunu tutub.
Demokratik Qüvvələrin Milli Şurasının rəhbərliyində təmsil olunur.
1998-ci ildə 2 il müddətinə şərti azadlıqdan məhrumetmə cəzasına məhkum edilib.
2013-cü il fevralın 4-dən 2016-cı il martın 17-dək həbsdə olub.
2020-ci il martın 22-də Tofiq Yaqublu yenidən tutulub, sentyabrın 3-də Bakının Nizami Rayon Məhkəməsində ona 4 il 3 ay müddətinə azadlıqdan məhrumetmə cəzası kəsilib.
Sentyabrın 18-də Bakı Apellyasiya Məhkəməsi Tofiq Yaqublu haqqında həbs qətimkan tədbirini ev dustaqlığı ilə əvəzləyib.
