“Neftçi” ilk səddi keçdi
UEFA Çempionlar Liqasındakı Azərbaycan təmsilçisi “Neftçi” iyulun 14-ü Bakıda birinci raundun cavab oyununu keçirib. Novator.az-ın məlumatına görə, Gürcüstanın “Dinamo” (Tbilisi) komandasını qəbul edən bakılılar 2:1 hesabı ilə qalib gələrək mərhələ adlayıblar. Səfər matçında da “Neftçi” eyni hesabla üstün gəlmişdi.
Bakılılar ikinci raundda (20-28 iyul) Yunanıstandan “Olimpiakos”la görüşəcək.
1937-ci ildə yaradılmış “Neftçi” üst-üstə 27 mövsüm SSRİ çempionatının güclülər dəstəsində yarışıb, 1966-cı ildə bürünc medallara sahib çıxıb. 1992-ci ildən keçirilən milli çempionatlarda 9 zəfəri var.
Komanda 2012-2013 mövsümündə Avropa Liqasının qrup mərhələsində oynayıb.
“Olimpiakos” 1925-ci ildə yaradılıb, 46 dəfə Yunanıstan çempionu olub. 1959-cu ildən başlayaraq 56 mövsüm Avropanın klub turnirlərinə vəsiqə alıb.
