Xəbərdarlıq: eyni vaxtda koronavirusun iki variantına yoluxmaq olar
Bir adam eyni vaxtda koronavirusun iki variantına yoluxa bilər. Novator.az saytı ABŞ-ın “Röyters” agentliyinə istinadla bildirir ki, mütəxəssislər Belçikada qeydə alınan hadisəni təhlil edəndən sonra belə bir xəbərdarlıqla çıxış ediblər.
Bu ilin martında Belçikada 90 yaşlı qadın eyni vaxtda koronavirusun həm alfa, həm də beta variantına yoluxub.
Qadın koronavirus əleyhinə peyvənd olunmayıbmış. O, tək yaşayırmış və virusa yoluxanadək ona evdə tibbi yardım göstərilirmiş.
Mart ayında qadının halı pisləşib və o, xəstəxanaya yerləşdirilib. Müayinələr zamanı 90 yaşlı qadının COVİD-19 infeksiyasına, özü də virusun həm alfa, həm də beta variantına yoluxduğu üzə çıxıb.
Qadının həyatını xilas etmək mümkün olmayıb, mart ayında o, müalicə olunduğu xəstəxanada vəfat edib.
Məsələ iyulun 9-12-də Avropa Klinik Mikrobiologiya və İnfeksion Xəstəliklər Konqresində geniş müzakirə olunub.
Müzakirələrin yekununda konqres bəyan edib ki, ilk dəfə qeydə alınmasına baxmayaraq, Belçikadakı hadisə bir nəfərin eyni vaxtda virusun iki variantına yoluxmasının mümkün olduğunu göstərib.
Mütəxəssislərin fikrincə, qadın alfa və beta variantlarına ayrı-ayrı adamlardan yoluxub. Amma yoluxmaların necə baş verdiyi, virusun qadına kimlərdən keçdiyi bəlli deyil.
2019-cu ilin dekabr ayında Çində üzə çıxaraq 222 ölkə, ərazi və məkana yayılan koronavirus infeksiyası indiyədək 4 milyondan çox adamın ölümünə səbəb olub.
2021-ci ilin yazında Dünya Səhiyyə Təşkilatı koronavirusun ortaya çıxan yeni variantlarına adlar verib. İlk dəfə Böyük Britaniyada aşkarlanan variant “alfa”, ilk dəfə Cənubi Afrikada peyda olan variant isə “beta” adlandırılıb.
Koronavirusun bu variantları ötən ildən dünyanın bir çox ölkəsində, o cümlədən Belçikada yayılıb.
Mənbə: Reuters.com
