16 çempionatın 10 qalibi
Novator.az Avropa futbol çempionatlarının tarixinə nəzər salıb.
1960-2021-ci illərin 16 çempionatında 10 milli komanda zəfər yaşayıb. İspaniya və Almaniyanın 3, İtaliya və Fransanın 2, SSRİ, Çexoslovakiya, Niderland, Danimarka, Yunanıstan və Portuqaliyanın 1 çempionluğu var.
1960, 1964, 1968, 1972, 1976-cı illərin final mərhələlərinə 4 milli komanda qatılıb.
İlk çempionat 1960-cı ildə Fransada keçirilib, SSRİ yığması çempion olub.
1964-cü ilin çempionatında qızıl medallara ev sahibi İspaniya sahib çıxıb.
1968-ci ildə final mərhələsi İtaliyada keçirilib, meydan sahibi çempionluq əldə edib.
1972-ci ilin final mərhələsi Belçikada olub, Almaniya Federativ Respublikası qızıl medallar qazanıb.
1976-cı ildə final mərhələsi Yuqoslaviyada keçirilib, Çexoslovakiya çempion olub.
1980, 1984, 1988, 1992-ci illərin final mərhələlərinə 8 milli komanda qatılıb.
1980-ci ilin final raunduna İtaliya ev sahibliyi edib, Almaniya Federativ Respublikası çempion olub.
1984-cü ilin final mərhələsi Fransada olub, meydan sahibi qızıl medallar qazanıb.
1988-ci ildə final mərhələsi Almaniya Federativ Respublikasında keçirilib, Hollandiya (Niderland) çempion olub.
1992-ci ilin çempionatı İsveçdə keçirilib, Danimarka zəfər əldə edib.
1996, 2000, 2004, 2008, 2012-ci illərin final mərhələlərinə 16 milli komanda qatılıb.
1996-cı ildə İngiltərədə keçirilən çempionatda Almaniya birinci olub.
2000-ci ilin çempionatına Belçika və Hollandiya ev sahibliyi ediblər, Fransa qızıl medallar qazanıb.
2004-cü ilin final raundu Portuqaliyada keçirilib, Yunanıstan çempion olub.
2008-ci ilin çempionatı Avstriya və İsveçrədə keçirilib, İspaniya zəfər əldə edib.
2012-ci ilin final mərhələsinə Ukrayna və Polşa ev sahibliyi ediblər, İspaniya çempion olub.
2016-cı ilin final mərhələsi Fransada 24 milli komandanın iştirakı ilə keçirilib, Portuqaliya çempionluq qazanıb.
16-cı Avropa çempionatı 2020-ci ilə təyin olunub, koronavirus pandemiyası üzündən 2021-ci ilə qalıb, Amsterdam, Bakı, Budapeşt, Buxarest, Kopenhagen, Qlazqo, London, Münhen, Roma, Sankt-Peterburq və Sevilya şəhərlərində 24 milli komandanın iştirakı ilə keçirilib, İtaliya çempion olub.
A qrupunda yer alan İtaliya Türkiyəni və İsveçrəni 3:0, Uelsi 1:0 hesabları ilə yenib.
1/8 finalda italyanlar Avstriyanı (2:1 – əlavə vaxtda), 1/4 finalda Belçikanı (2:1), yarımfinalda İspaniyanı (1:1, penalti seriyasında – 4:2) ələyib, finalda İngiltərədən üstün olub (1:1, penalti seriyasında – 3:2).
