Rusiyada bahalaşma: beş ilin rekordu təzələndi
Rusiyanın Federal Statistika Xidməti inflyasiya göstəricilərini açıqlayıb.
Novator.az saytı “Novaya qazeta”ya istinadla bildirir ki, rəsmi məlumatda 2021-ci ilin iyun ayında ölkədə inflyasiyanın ötən ilin eyni dövrü ilə müqayisədə 6,5% gücləndiyi qeyd olunub. Bu, 2016-cı ilin avqust ayından bəri ən yüksək göstəricidir.
Yaxın dövrlə – 2021-ci ilin may ayı ilə müqayisə etdikdə isə, rəsmi məlumata əsasən, iyunda inflyasiya 0,7% təşkil edib.
Federal Statistika Xidmətinin açıqlamasına görə, iyunda ərzaqlardan ən çox çuğundur (58,4%), kartof (20,3%) və kələm (14,3%) bahalaşıb.
Türkiyəyə turist səfərlərinin qiyməti 38,9% artıb.
İstirahət evləri və pansionatlara putyovkalar 10,7%, sanatoriyalarda istirahət 6,5%-dək bahalaşıb.
Qatarın növündən asılı olaraq plaskart vaqonlarda gediş haqqı 23-24%, kupelərdə 9,6% artıb.
Mənbə: Novayagazeta.ru
