Ermənistan: yeni seçilmiş parlament niyə toplaşmır?
Ermənistanın yeni seçilmiş parlamentinin fəaliyyətə başlaması ləngiyir. Novator.az bildirir ki, Ermənistan Konstitusiyasına görə, növbədənkənar seçkidə formalaşan parlamentin ilk sessiyası rəsmi nəticələr təsdiqlənən gündən sonrakı ikinci bazar ertəsi çağırılmalıdır.
Növbədənkənar parlament seçkisi iyunun 20-də keçirilib, Mərkəzi Seçki Komissiyası rəsmi nəticələri iyunun 27-də təsdiqləyib. İyunun 27-dən sonrakı ikinci bazar ertəsi iyulun 5-nə düşüb. Ancaq yeni seçilmiş parlament həmin gün toplaşmayıb.
Sessiyanın ləngiməsi Konstitusiya Məhkəməsinə seçkidən şikayətlər verilməsindən doğur.
Proporsional sistemin tətbiq olunduğu 20 iyun seçkisinə 21 siyasi partiya, 4 blok qatılıb. İyunun 27-də Mərkəzi Seçki Komissiyası seçkinin nəticələrini rəsmiləşdirib. 107 nəfərlik yeni parlamentdə hökumət başçısı Nikol Paşinyanın Vətəndaş Sazişi Partiyasının 71 mandatla təmsil olunacağı açıqlanıb.
İkinci prezident Robert Köçəryanın, Daşnaksütun Partiyası və Dirçələn Ermənistan Partiyasının cəm olduğu Ermənistan bloku 29, üçüncü prezident Serj Sərkisyanın sədrlik etdiyi Ermənistan Respublikaçılar Partiyasını Milli Təhlükəsizlik Xidmətinin sabiq direktoru Artur Vanetsyanın Vətən Partiyası ilə birləşdirən “Qürurluyam” bloku 7 mandat alıb.
Seçkinin rəsmi nəticələri 2018-ci il mayın 8-dən baş nazir kürsüsündə oturan Nikol Paşinyana yenidən hökumət qurmaq imkanı verir.
Ermənistan, “Qürurluyam” blokları, həmçinin parlamentə düşə bilməyən Erməni Vətəni və Oyanış partiyaları 20 iyun seçkisinin rəsmi nəticələrinin ləğvi müraciəti ilə Konstitusiya Məhkəməsinə üz tutublar. Bir icraatda birləşdirilən şikayətlərə iyulun 9-da baxılacaq. İş üzrə əsas cavabdeh Mərkəzi Seçki Komissiyası, digər cavabdehlər Baş Prokurorluq, Ermənistan Polisi, Televiziya və Radio üzrə Milli Komissiyadır.
Hakim Vətəndaş Sazişi Partiyası prosesdə üçüncü tərəf kimi iştirak etmək niyyətindədir.
