Sərhəddə olay: ölən var
Dövlət Sərhəd Xidmətinin 6 iyul məlumatına görə, iyulun 5-i saat 23:45-də Sərhəd Qoşunlarının Cəlilabad rayonunun Sərxanlı kəndi yaxınlığındakı sərhəd zastavasının xidməti ərazisində 5 şəxsin İrandan Azərbaycan istiqamətində dövlət sərhədini pozması aşkar olunub: “Dayan” əmri verilməsinə və havaya xəbərdarlıq atəşi açılmasına baxmayaraq sərhəd pozucuları silahlı müqavimət göstərib, avtomat silahdan atəş açıb. Silah tətbiq olunub, sərhəd pozucularından biri – hüquq mühafizə orqanlarının axtarışında olan 1992-ci il təvəllüdlü Azərbaycan vətəndaşı Qurbanov Məzahir Sahil oğlu güllə yarası alıb. O, ilkin yardımdan sonra Cəlilabad Rayon Mərkəzi Xəstəxanasına təxliyə edilib, lakin yolda ölüb. Digər sərhəd pozucuları İran ərazisinə qaçıblar.
Əraziyə baxış zamanı 1 ədəd çantada narkotik vasitə və dərman preparatları aşkar olunaraq götürülüb.
İran tərəfi dərhal məlumatlandırılıb, hadisə yerində Azərbaycan və İran sərhəd nümayəndələrinin görüşü keçirilib.
Hazırda Dövlət Sərhəd Xidmətinin və Baş Prokurorluğun əməkdaşları zəruri əməliyyat-istintaq hərəkətləri həyata keçirir”.
